Tomate ekologikoak Kurtzioko antzerkiolan

Erabiltzailearen aurpegia

ANDY HANSONEN DOSIA

        Kurtzioko oholtzan, ikasturtean zehar landutakoa, hurbildutako ikuslego zabalari erakusteko aukera izan genuen elkarlanean sortutako antzezlanaren bidez. Uta Hagenek esaten zuen, tomate eder bat nekazaritza ekologikoaren bidez landatu eta hazteko behar den lana, zaintza eta denbora bera, sartu beharko lukeela aktore batek papera ondo prestatzeko. Baina larregitan ikusi izan ditut, antzerkigintza, memorizatu, ozenki hitz egin eta ikusleei bizkarra ez ematera mugatzen duten irakasleak; zuzendaritza zuzenketa bihurtuz, sormena, irudimena, askatasuna eta kaltegarriagoa oraindik gozamena ere erabat baztertuz.

        Beste batzuk aldiz, ikasleekin (ume zein heldu) nekazaritza ekologikoa egiten saiatzen gara, nik ikasle/aktoreak pertsona inteligenteak bezala tratatzen ditut eta nire helburua da ikasleek, prozesuan lehenengo eta taula gainean gero, disfrutatzea. Eurekin batera hutsetik abiatzen dudan sortze prozesu berri bakoitzean, aktoreen zuzendaritza eta sorkuntza uztartzen ditut, aktoreengan sormena bultzatuz, eta euren sormenaz baliatuz ere, bilatzen dudan interpretazio mota lortzen saiatzeko asmoz. Aktore lana interprete hutsa izatetik haratago doan sorkuntza artistikoa dela sinesten dudalako.

        Eta aurreko ostiralean Kurtzion, sei tomate bikain taularatu zirela uste dut benetan, jateko unerik onenean, ez gordinegi ezta larregi entseatzeagatik freskotasuna galduta ere, taula gainean gozamen ederra hartu zuten sei tomate heldu eta zaporez beteak: Izaro, Jon, Lizar, Maitane, Nerea eta Oier, mila esker neuregan ezarritako konfiantzagatik eta zuen konpromesu, lan, irudimen, umore, sentsibilitate, sormen, zintzotasun, gogo eta izaeragatik.

Andy Hansonen dosia
Jon Urraza
aktorea
Hiruka 20. paperezkoa 2015-06-10

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun