Erandioko udalak Astrabuduako Mendiguren plaza zulo bat bihurtu nahi du.

Erabiltzailearen aurpegia
Erandioko udalak onartutako kreditu aldaketari esker, 450.000 euro bideratuko dituzte Astrabuduko Mendiguren plaza estaliko du. Hauxe litzateke gure Astrabudua auzo txikian dugun espazio zabal bakanetako bat betiko kondenatzea eguzki argia oztopatuz eta negutegi beroegi sortuz, auzotarren nahia kontuan hartu gabe.

Duela gutxi jakin dut Erandioko Udalak Astrabuduako Mendiguren plaza estaltzeko aurrekontua onartu duela. Batetik, harrituta nago horren beharrik ikusten ez dudalako eta, bestetik, gure auzoan beste behar batzuk ditugulako honen aurretik.

Kontuan hartzen badugu Astrabudua auzoa oso modu desordenatuan eraiki zela eta eguzkiaz gozatzeko espazio zabal gutxi ditugula uste dut Mendiguren plaza estaliz irabazi baino gehiago galduko dugula.

Argia bizitza da. Astrabudua auzo txikia da eta espazio libre gutxi daukagu. Luxua litzateke daukagun argi apurra oztopatzea. Urtean zehar, haurrek zein helduek denbora asko pasatzen dute Mendiguren plazako gune ireki honetaz gozatzen. Estalpearekin argitasun hori galduko genuke eta eguraldi beroarekin eremu hau negutegi bat bihurtuko litzateke, bero gehiago sortuz.


Bestalde, Astrabuduako jaietan, Mendiguren plaza txosnagunea da, erromeriak eta kontzertuak bezalako ekitaldi ezberdinez gozatzeko leku oso egokia. Plaza estaliz gero, alde batetik, lehen esan bezala, espazio honetan bero handia izango litzateke, abuztuaren erdian negutegi efektuagatik eta, bestetik, estalkia oso altua izan beharko litzateke publikoak oholtza gainean dagoen ekitaldia ikusi ahal izateko eta inguruko etxeetako bizilagunentzat, batez ere lehen solairuan bizi direnentzat, oztopo handia izango litzateke, daukagun espazio handia baliogabetu eta kondenatuz. Mendiguren plaza zulo bat bihurtuko litzateke.


Astrabuduan ditugun espazio handi bakanak mantendu behar ditugu. Eta eguraldi txarrarekin beharrezkoa bada, lehen bezala behin-behineko karpa jartzea oso ideia ona da, espazioak kondenatu gabe. Udalak karpa bat eros dezake, alokatu beharrean horrela dirua aurreztuko genuke.


Beste askok bezala, espazio berri bat sortzea proposatzen dut: frontoia. Ignacio Aldekoa ikastetxearen ondoan dagoen skate parkean, adibidez, kokapen ona litzateke.. Espazio estali berri bat irabaziko genuke Astrabuduako bizilagunentzat eta eskolak ere erabil lezake. Frontoia, ostera, bada Astrabutarren aspaldiko eskaera bat.


Kontuan hartuko duzuelakoan,

auzo hobeago baten alde.


Aupa Astrabu

Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun