Hartara, lau hilabetez Getxo udalerriko Gobela eta Fadura kiroldegietako instalazioak erabiltzen egon ostean, Leioako kirol azpiegituran plisti-plasta ibiltzeko aukera edukiko dute berriro Sakonetako 4.000 bazkidek baino gehiagok. Bertan dabiltzan kirol taldeak ere lekuz aldatu behar izan zituzten, ezustean, beste obra batzuen beharra agertu ostean. Esaterako, waterpoloko talde federatuak Erandioko igerilekuan entrenatzen ibili dira denbora guzti honetan. Horiei guztiei izandako pazientzia eskertu die Mari Carmen Urbieta alkateak. Obra guztiek, aurreikusitakoek zein ezustean agertutakoek, 375.000 euro inguruko gastua ekarri dio Leioako Udalari.
Abuztuan egin ohi den kiroldegiaren itxiera aprobetxatuz, aurten, igerilekuak egokitzea erabaki zuen Udalak. Hobekuntza obra horiek honakoak ziren: igerilekuen aireztapena hobetzea eta zonalde honetako sabaia egokitzea. Eta bide batez, filtroak eta konpentsazio basoak hobetzea, Sakonetako igerilekuen “kalitatea nabarmen handitzeko” asmoz. Zoritxarrez, hobekuntza horiek egiten ziren bitartean, ezustean, estrukturan egin beharreko beste obra baten beharra agertu zen. Kaltetuta zeuden sabaiari eusten zioten zutabeek, udal iturriek bere garaian azaldu zutenez. Hori dela eta, lehenengo lanei ekin baino lehen horiek konpondu behar izan zituzten, Sakonetako igerilekuen ohiko itxialdi garaia beste hiru hilabetez luzatuz.
Obra horiez gain, igerilekuetako ura desinfektatzeko izpi ultramore sistema jarri dute, horrenbeste kloro erabili behar ez izateko.