Giro handiko partida jokatuko du Leioak zapatu honetan, 18:00etatik aurrera, Bilbao Athleticen aurkako Bizkaiko derbi beroa hartuko duela Sarrienak. Horretaz jakitun, kirol taldeak Klubaren Egun Erdia izendatu du data hori, horrek dakarrenarekin. Bigarren B mailako norgehiagoka ikusteko bazkideek eta abonatuek 7 euro ordaindu beharko dute. Kirol mailan, berriz, bi taldeen arteko aldea bi puntukoa besterik ez da, nahiz eta Leioak 10. postua izan eta bilbotarrek seigarrena. David Movillaren gizonek, baina, zail izango dute ahaztea pasa den irailean lehoi-kumeek eman zieten jipoia, Lezaman 5 eta 1 jaso zutela, hamaikako ofizialean hainbat bajarekin jokatutako partidan. Halere, mailan gelditzeko helburua eskuratzeko hiru puntuak oso lagungarriak izango direlakoan badaude aldagelan.
Derbi berezi honetara hainbat aldaketak baldintzatuta helduko dira urdin-gorriak. Izan ere, Adrian Abasolo aurrelariak taldea utzi du, minutu gehiago eskainiko dion talde bateren bila. Halere, irteera horrek ez du gaiztotu aldagela, eta klubak onena desiatu dio durangarrari, eskaini duen profesionaltasuna eta laguntasuna eskertzearekin batera. 21 partidetatik 10etan jokatu du Abasolok eta baita gol bat sartu ere. Era berean, ikusi beharko da Ander Larruceak ezkerreko hankako koadrizepsean pairatutako muskulu-hausturak zelan eboluzionatzen duen, baina litekeena da ez zelairatzea. Pasa den partidan lesionatu zen Larrucea Trival Valderasen aurkako berdinketan. Azkenik, Sergio Garciari zigorra ohartarazi diote.
Bitartean, taldea sendotzeko Ali Diakité defentsa-erdilaria fitxatu du Leioak. Boli Kostako jokalariak Cuencatik dator, pasa den astean bertako kontratua indargabetuta. Javier Landeta presidentea harro agertu da lortutako errefortzuaz. Diakiték 20 urte, 77 kilo, 1,80 metro eta ahalmen fisiko handia ditu, joko sendoaz laguntzen dituen ezaugarriak. Dagoeneko bere lankide berriekin entrenatzen dabil eta ikusteke dago David Movillak hasierako hamaikakoan jarri ala probatzeko minutuak emango dizkion.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
