Etorkizunerako ere, txikientzako ingurumen-hezkuntzako ikasgela abian jarri nahi dute kokaleku horretan, udalerriko eskolakaz aktibitate desberdinak koordinatuz, udal arduradunek nabarmendu dutenez.
Jardunbideak
"Garbiketa eta bilketa zerbitzu berriaren oinarriak Tokiko Agenda 21-ek Leioarako markatzen dituen premisetan daude", Mari Carmen Urbieta alkateak nabarmendu duenez. Jarraibide horiek betez, ingurumenean inpakturik txikiena izango du eta birziklatzea ahal beste sustatu gura dute hiru jardunbideren bitartez: lehena, emisio atmosferiko eta akustikoak murriztea, ahal den guztia, arlo horretan aurrerakuntza teknologiko handiak dauzkaten ibilgailuak erabiliz. Halaber, ibilgailu txikienak (brigadak eta laguntzarakoak) hibridoak edo elektrikoak dira; eta kaleak garbitzeko makinek, haize-makinek eta bestelako tresnek intsonorizazio sistemak edukiko dituzte.
Bigarren jardunbidea baliabide naturalen kontsumoa murriztean datza. Alde batetik, ibilgailu hibrido eta elektrikoak erabiliz, nabarmen jaisten omen da erregai eta lubrifikatzaileen erabilera, eta bestetik, ur edangarriaren kontsumoa jaitsi gura dute igerilekuetako ura (edan ezin dena) aprobetxatzeko sistemak eta ibilgailuak gordetzen diren tokian egongo den euriak hartzeko sistema erabiliz. Ur hori, horrela, ureztatzeko, garbitzeko, hezetzeko eta abar erabili ahal izango dute.
Eta hirugarren jardunbidea birziklatze tasak handitzeari dagokio, albait hondakin gutxien bidaliz zabortegietara edo erraustegietara. Hori onuragarria izango da udalerriaren jasangarritasun ekonomikorako. Horretarako, bilketa-plana diseinatu dute, "jatorrian hondakinak banatzea lehenesten duena, eta ondorioz, gehiago birziklatzen duena berrerabil, berreskura edota birzikla daitezkeen zatikien bilketa zerbitzuak indartuz eta zerbitzu berriak sortuz, hala nola, hondakin organikoak biltzeko zerbitzua". Gainera, orain arteko bilketa selektiboko zerbitzuak ere indartuko dituzte, papera eta etxeko tresna handiak biltzekoak, alegia.