Eguen honetan, martxoak 26, berbodromoa egingo dute Leioan, herriko euskaldunak eta euskara ikasten dabiltzanak harremanetan jartzeko asmoz. Bi saio egingo dituzte Sakoneta kiroldegian: bata 10:15ean eta bestea 19:00etan. Antolatzaileek adierazi dutenez, aurretik izena eman beharko da Lamia AEK euskaltegian edo Mastitxu udal euskaltegian.
Berbodromoa 16 urtetik gorako euskaldunei eta euskara ikasten dabiltzanei zuzenduta dago. Sakoneta kiroldegian egingo dute, aulkiak egongo dira taldeak egiteko eta zenbakiekin zehaztuko dituzte taldeak. Talde bakoitzean bost pertsona egongo dira, dinamizatzailea eta lau lagun, berriketa lasaian kafea hartuz. Taldeetan euskara ikasten dabilen jendea euskara dakien jendearekin elkartuko dute eta interes gai bati buruz berba egingo dugu.
Aurten gai bakarra edukiko dute berbagai: euskara. Hala ere, hiru azpiatal izango ditu jendeak berbagai ordubeteko tartean. Azpiatal bakoitzarentzat 15-20 minutu izango dira eta baten eta bestearen artean, parte-hartzaileak taldez mugituko dira, berbakidez ere aldatuz.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.