Txapelketa martxoaren 13tik 15era jokatu zuten Liman; bertan parte hartu zuten Peru, Uruguai, Kolonbiako Antioquia departamenduko eta Euskal Herriko selekzioek. Euskal herritarrek kolonbiarrak 9-8 garaitu zituzten finalean, penaltitan. Joan Lluis Albellak zuzendutako taldea, baina, estropezuka hasi zen ligaxkan, Antioquiaren aurrean 15-13 erori baitzen. Halere, Euskal Herriak erreakzionatu, eta beste arerio biak erraz gainditu zituen: 16-7, Peru; eta 14-4, Uruguai. Finalerdietan, Peruren kontrako norgehiagokan berriro irabazi zuten bertokoek, markagailua apur bat estuago gelditu zen: 13-8. Finalean, arauzko denbora amaituta, 5-5 berdindu zuten Antioquiak eta Euskal Herriak, baina penaltietan erakutsitako trebetasunak kopa Euskal Herrira ekartzea ahalbidetu zuen.
Liman jokatu zuten Uribe Kostako taldeetako jokalariak honakoak dira: Xabier Gomez, Jorge Julian Juanes, Xabier Orozko, Eneko Orozko, David Estallo eta Unai Azkorra (Askartza) eta Diego Bartolome (Leioa).