Leioako Behargintzak 42 enpresa-proiektu bultzatu zituen 2014an, udal iturriek adierazi dutenez. Ekonomia eta enplegua sustatzeko herri-erakundeak aholkularitza-zerbitzuak eskaintzen ditu enpresak abiarazteko orduan, negozio berritzaile eta lehiakorrak sortzeko helburuagaz. Leioako Behargintzak daukan “eginbehar nagusia” da “autoenplegu-proiektua martxan jarri gura duten bizilagunei, edo, kanpokoak izanda, Leioan, herriak duen ahalmen ekonomikoagatik, enpresa abiarazi gura dutenei lagundu eta aholkatzea”, gaineratu dute agintari leioaztarrek.
Kasu bietan, Behargintzak prestakuntza berezia eskaintzen du enpresak sortzeko eta kudeatzeko arloetan, eta, horrez gainera, negozio-eredua zehazteko aholkularitza ematen du. Ildo berean, enpresa berriaren bideragarritasun-plana gainbegiratzen du, eta informazioa ematen du ondokoen gainean: forma juridikoa, hasteko izapideak eta diru-laguntzak.
“Azken urteotan batutako datuok berresten digute ekintzailetzak gorako joera duela, kasu batzuetan, gaurko lan-merkatuko egoeraren eraginez. Hala ere, enpresa sortzeko interesa izan zein langabezia egoera baten ondorioz izan, jendea udal-zerbitzu honetara dator ilusio eta gogo handiz, eta horiek dira euren proiektuari forma ematen hasteko zutabeak”, azaldu dute Leioako Behargintzatik. Udal aldizkarian emango dute udalerrian zein leioaztarrek kanpoan sortutako enpresen berri.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.