Leioako Umore Azokak baditu sarituak: Markeliñe konpainiaren “Andante” lanarentzat izan da Euskadiko Kale Ikuskizunik Onenaren saria; Les Mobilettes konpainia frantsesak eskuratu du Kale Ikuskizunik Onenaren Saria “Cafe Frappe” obragaz; eta azkenik, Paula Quintanarentzat izan da Artista / Ikuskizun Berri Onenaren Saria “Latente” lanagatik. Garaikurrak eta diplomak jasoko dituzte irabazleek, eta Paula Quintanak Hameka sorkuntza fabrikan egonaldia egiteko aukera ere edukiko du sari gisa. Datorren urteko edizioan egingo da sari banaketa ekitaldia. Bestalde, aurtengoan Juan Ortega Roldan antzerki sustatzaileak jaso du Umore Azokako 2015eko Ohorezko Saria, Eibarko Antzerki Topaketak antolatzen egindako lau hamarkadengatik eta arte eszenikoen alde egindako lan eskergagatik. Orotara, 28.000 pertsona inguru batu ditu jaialdiak eguenetik domekara bitartean, eta 50 talderen 170 emanaldi baino gehiago eskaini ditu.
Pozik azaldu dira antolatzaileak lortutako erantzunagaz eta egitarauak izan duen kalitateagaz. Kalean ere erantzun positiboa jaso dutela nabarmendu du Ana Lopez zuzendariak: “Publikoaren komentarioak oso onak izan dira, eta emanaldietan oso harrera ona eduki dute”. Eguenean euriak egitarauan moldaketa gutxi batzuk eragin zituen, baina eguraldi onarekin jendez bete dira asteburuan Leioako kaleak, eta jendetza bildu da egunero.
Umore Azokak duen azoka izaera ere agerian gelditu da lau egunotan. Sektorearen topagune izan den Artekale gunean mugimendu bizia izan baita. 150 programatzaile eta banatzaile baino gehiago egon dira Leioan egunotan piezak ikusten, eta oso pozik azaldu dira antolatzaileak azokan izan den mugimendu komertzialarekin. “Fruitu oso emankorrak eman ditu topaketak merkatuaren aldetik eta oso baliagarria izan da kale arteen sektorea ikusgarri jartzeko”. Lopezek adierazi bezala hirukoitza baita Umore Azokaren izaera. “Festibala da Leioara hurbiltzen den jendearentzat, festa da herriarentzat, eta azoka da profesionalentzat”. Eta hiru zutabeetan izandako emaitzen balorazio positiboa egin dute antolatzaileek aurtengoan.
Saritutako ikuskizunen, azoka egunetako emanaldien edota konpainien argazkiak ikusteko egin klik hemen.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
