Txikiak Txiki eta Gure Ohiturak dantza-taldeakaz batera, XV. Jota Txapelketa antolatu du Leioako Udalak. Izena emateko epea ekainaren 11n amaituko da, 18:00etan. Sariketa ekainaren 14an izango da, Kandelazubietan, 12.00tan. Gura duten neska-mutil bikote denek parte hartu ahal izango dute eta, ohiturak agintzen duen legez, tradizioko jantziakaz joatea izango da horretarako baldintza bakarra. Maila bi ezarri dituzte: 16 urte baino gutxiagoko dantzariak, eta dantzari nagusiak, 16 urtetik gorakoak. Gehienez, 10 bikote onartuko dira maila bakoitzeko. Kopuru hori gaindituz gero, antolatzaileen esku geratuko da bikote gehiago onartzea ala ez. Parte hartu gura dutenek izena emateko orria bete beharko dute, eta posta bidez edo posta elektronikoz Kultur Leioara bidali.
Sariei dagokienez, nagusien mailako lehenengo hirurek dirua jasoko dute: 300, 230 eta 210 euro, hurrenez hurren. 16 urtez azpikoetan ere, 220, 180 eta 150 euroko dirusariak egongo dira, hiru bikote onenentzat. Maila bakoitzeko bikote-irabazleek, berriz, txapela eta lepoko zapia ere jasoko dituzte. Kategoria bakoitzean aipamen berezi bat egiteko aukera edukiko du epaimahaiak. Azkenik, irabazle suertatzen ez diren bikote nagusi denek 110 euroko dirusaria jasoko dute, eta bikote gazteek, 100 euroko dirusaria.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.