Eguazten honetan, ekainak 10, Batxilergoa bukatu duten Araba, Gipuzkoa eta Bizkaiko 9.552 ikaslek (iaz baino %2,78 gehiagok) unibertsitatera sartzeko probak hasiko dituzte EHUn. Horietatik bi herenek euskaraz egingo dituzte probak. Batxilergoko ikasleez gainera, goi mailako heziketa ziklo bat egin duten eta fase espezifikora besterik aurkeztuko ez diren beste 651 ikasle gehitu behar zaizkie horiei. Etsaminak bukatuko dituzte. Selektibitatea "proba bidegabe eta arrotza" dela salatzeko, besteak beste, Leioako campuseko Mikel Laboa plazan egingo dute kontzentrazioa bihar goizeko 08:00etan, Ikasle Abertzaleak (IA), Ernai, STEILAS, LAB eta Sortzen erakundeek deituta.
Selektibitatearen harira, hezkuntza eredu propio bat defenditu eta hezkuntza komunitateagaz egungo ereduaren inguruko eztabaida "zabala eta argia" martxan jartzeko eskatu diote Ikasle Abertzaleak (IA), Ernai, STEILAS, LAB eta Sortzen erakundeek Eusko Jaurlaritzaren Hezkuntza Sailari. "Bertako ikasleei eduki eta eredu arrotzak sartzeko asmoz" proba hau "Madrildik ezarri zigutela" adierazi dute. Gainera, ikasleak "euren etorkizuna erabat baldintzatuko duen azterketa egitera behartuta" daudela salatu dute. Barikuan, ekainak 12, manifestazioa egingo dute, 18:00etan, Bilboko Moyua plazatik abiatuta, "Selektibitateari ez!" goiburu pean.
Unibertsitatera sartzeko probak ekainaren 10ean, eguaztena, 08:45ean hasiko dira eta 18:45ean bukatu. Bigarren egunean, eguena, hilak 11, azterketak 09:00etatik 18:45era arte izango dira eta, hirugarren egunean, barikua, 09:00etatik 15:00etara.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.