Leioako Udala akordio batera heldu da Pinosoloko kanpoko igerilekuetan dagoen tabernako arduradunakaz terraza-gune berria jartzeko, horrela, erabiltzaileek, janaria eta edaria kontsumitzeko aukera izan dezaten. Janaria eta edariaren “kontsumo librerako” gune berrira sartzeko, orain arte terraza komunera sartzen zen leku beretik joan behar da, "erabiltzaileak ez ibiltzeko elikagaiakaz soropiletik eta osasun azaro posibleak ekiditeko", udal iturriek aipatu dutenez. Terrazarako sarbide berria ez dutenez jarri, lorategi-gunean ez dute jendeak gozatu ahal izateko espaziorik kendu.
Gune berriak behar bezala seinaleztatuta daude itxitura bidez eta erabilgarri daude honezkero. Erabiltzaileek gune berri hau ezagutzeko, azalpen-planoak jarri dituzte instalazioetan.
Erabilera desberdineko gune bi
Pinosoloko kanpoko igerilekuetako erabiltzaileek, orain, gune desberdin bi dituzte: batean, tabernan erositako edariak eta janaria kontsumitu ahal izango dira; eta bestea, “kontsumo libreko” gunea da, kanpotik ekarritako janaria eta edaria kontsumitzeko, alegia.
Gogoratu beharra dago igerilekuko eta gune berdeko hondartzetan debekatuta dagoela jatea eta edatea (erabilera kolektiboko igerilekuen Osasun Araudiak dioen legez, Eusko Jaurlaritzaren 32/2003 Dekretuaren arabera). Ura edatea, ostera, ez dago debekatuta, behar bezalako hidrataziorako.
Bestalde, kirol instalazioen kanpoaldetik tabernara sartzen direnek terraza propioa izaten jarraituko dute. Baina hortik, ezin izango da instalazioetara sartu.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
