Deialdi honek laguntzak arautzen ditu, irabazi-asmorik gabeko erakundeen bidez herrialde pobreetan garapenerako lankidetza-ekintzak egiteko. Lehentasunezkoak izango dira jarduerak Latinoamerikan, Afrikan eta Asian; bereziki kontuan hartuko dira Saharako Errepublika Arabiar Demokratikoan (SAED) eta Dominikar Errepublikan egindako proiektuak.
Bestalde, jakina da, laguntza hauek jasotzeko, erakundeek hainbat baldintza bete behar dituztela, berbarako, egoitza soziala Bizkaian edukitzea eta Leioan bazkideak izatea. Bestetik elkarteak eta erakundeak irabazi asmo gabekoak izan behar dira eta Hirugarren Munduko garapenerako lanak egin behar izango dituzte.
Hainbat partida
Talde eskatzaileen inskripzio-epea irekita dago uztailaren 17ra arte. Beraz, laguntza eskuratu gura duten elkarteek euren izena eman behar izango dute eta kontutan izan beharko dute, beti bezala, hainbat partida ezberdin egongo direla. Hau honela, banakako partida bi daude nominatiboak direnak, hau da, daborduko esleituta daudenak Dominikar Errepublikan eta Saharan lan egiten duten talde birentzat, herrialde bi hauek Leioagaz anaituta daudelako.
Diru laguntza hauek eskuratu ahal izateko interesdunak eskakizunak bete beharko dituzte Udaleko Erregistro Orokorrean. Eskakizun honetan agertzen den moduan, jakin beharrekoa da laguntza hauek eskuratzeko hainbat baldintza bete behar direla. Alde batetik legalki eratuta izan behar dira elkarteak eta gutxienez urte bete arinago eratuak izan beharko dira. Elkarteen helburu bakarra herrialde behartu hauen aldeko lana egitea izango da, euren garapen soziala eta ekonomikoa hobetzearen aldekoa, hain zuzen, eta helburu hauek aurrera ateratzeko azpiegitura eta esperientzia nahikoa dutela jakinarazi behar izango dute. Gainera, joan den urtean laguntza hauetariko bat jaso duten taldeek dirua non gastatu duten jakinarazi eta frogatu beharko dituzte.