Hileko hirugarren barikuan izaten dira ezkontzak udaletxean, abuztuan izan ezik, 12:00etatik 13:30era. Artatza Jauregirako, ostera, aurretik egindako egutegi bat dago eskuragarri; normalean, martxoa eta urria bitarteko hileko lehenengo zapatuetan (abuztua salbu) egiten dituzte ezkontzak, 11:00etatik 13:30era.
Ezkontza egin gura dutenek eskabidea idatziz bete beharko dute eta Udal Erregistroan aurkeztu. Eskabidean, idatzita agertu beharko da aurreko zein kasu betetzen duten eskatzaileek, baita ezkontza zein zinegotzik egitea gura duten ere, haren izena adieraziz.
Leioako jatetxe batean eztei-oturuntza egitea nahikoa da Artatza Jauregian ezkontzeko
Leioako Artatza jauregian ezkontzeko eskaera gero eta lagun gehiagok egiten dutenez, arau malguagoa onartu du Udalak. Hala, ondoko baldintzetako bat baino ez du bete behar izango bertan ezkondu gura duen bikoteak: ezkonduko den bikoteko kideetako bat Leioakoa izatea; gutxienez, 10 urte Leioan erroldatuta egon izana, eta erroldako baja, ezkontza eskabidea tramitatu baino lehenagoko lau urteetan egin izana: udalerrian, etxebizitza baten jabe izatea; Leioako negozio, denda, edo orokorrean, enpresa bateko titularra izatea; Leioako enpresa, denda eta abarretan, lan-kontratua edukitzea; eta azkenik, eztei-oturuntza Leioako jatetxe batean egitea. Artatza Jauregian ezkontzeko indarrean dauden tasak ondokoak dira: 127 euro leioaztarrentzat eta 536 euro udalerrian erroldatuta ez daudenentzat. Udaletxean, ostera, doakoa da eta eskatutako baldintzak berberak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun