Kalean bizi den eskale bat haragiztatuko du Claire Ducreux dantzari frantsesak, "Refugiee Poetique" lanean. Munduari zentzua eta edertasuna itzultzeagaz amets egiten du eskaleak. Pertsonaia horrek, ahula denaren metaforak, erronka artistiko eta gizatiar horretara daroa Ducreux.
Udagoieneko eskaintza
Kultur Leioak 20 ikuskizun eskainiko ditu udagoien honetan: helduei begirako antzerki bi, hiru dantza proposamen, eta Musika Arimarekin zein Musika Gertu zikloetako sei kontzertu; umeei zuzendutako antzerki-ikuskizun bi, eta familiako kide denentzako zazpi saio. Horiez gainera, erakusketak, zinema, lehiaketak eta abar eg0ngo dira; Aterpe Leioa Gazteguneko, liburutegiko eta auzoetako aretoetako jarduerak ahaztu barik. "Bertoko eta nazioarteko artista garrantzitsuen emanaldiak eskainiko ditugu Kultur Leioan. Gure udalerriko mugak gaindituko dituen luxuzko egitaraua, kultura maite dutenen erreferente bilakatuta", adierazi zuen aurkezpenean Esti Bilbao Kultura zinegotziak.
Euskarazko emanaldiei dagokienez, azaroaren 20an, Jon Gerediagak idatzi eta Ander Lipusek zuzendutako Etxekoak antzezlana eskainiko du Huts Teatroa-Artedrama konpainiak. Horrez gainera, abenduaren 26tik 30era, bueltan egongo da umeentzako Gabonetan Antzerkira zikloa. Bestalde, Topagunearen Udagoieneko Ostera egitasmoaren barruan, azaroaren 27an, Silex bere azken lana oholtzaratuko du Oreka TX taldeak.
Bestalde, sarreretan ohiko beherapenak eta gonbidapenak edukiko dituzte Kultur Leioako bazkideek. Urriaren 2ko "Refugiee Poetique" ikuskizuna doan izango dute.
Urriko egitaraua
Urriak 2, barikua
20:30 Claire Ducreux-en (Frantzia) "Refugiee Poetique" dantza-ikuskizuna. Sarrera: 12 euro.
Urriak 9, barikua
21:00 Antonio Zambujo (Portugal) musikariaren kontzertua. Sarrera: 15 euro.
Urriak 16, barikua
22:00 The Two (Suitza) musika-taldearen kontzertua. Sarrera: 10 euro.
Urriak 18, domeka
18:00 Thomas Noone Dance taldearen "Alicia" familia-ikuskizuna. Sarrera: 5 euro.
Urriak 23, barikua
20:30 Sol Pico-ren (Katalunia) "One hit wonders" dantza-ikuskizuna. Sarrera: 12 euro.
Urriak 30, barikua
21:00 Mastretta (Madril) musika-taldearen kontzertua. Sarrera: 15 euro.