Euskadiko Lasto-jasotze Txapelketa Leioan jokatuko da

Iker Rincon Moreno 2015ko urr. 7a, 17:00
Deskargatu Info Ahotsak :

Kuadrillagaz jolasean hasi zen lastoa jasotzen "Tubi" txapelduna. © JOSE MARTIN BUSTINZA

Domeka honetan jokatuko da Leioan Euskadiko Lasto-jasotze Txapelketa. 13:00etatik aurrera, Mendibile Jauregiaren aurreko plazak hartuko du zortzi kirolariren arteko dema. 45 kiloko fardoa altxatzeko proban, faboritoa Jose Martin Bustinza Olabarri "Tubi" 43 urteko dimoztarra da. Izan ere, bere seigarren garaipena litzateke, aurten txapela jantziz gero. Bustinzak 2009an egin  zuen markarik onena: 24 jasoaldi.

Ardeo, Uribe Kostako ordezkaria

Ordutik hona, Bustinzak txapelketa bakarrari utzi dio ihes egiten: 2012koari. Urte hartan, Jon Lapazaran markinarra nagusitu zen, Unai Ardeo Zaldua getxoztarragaz lehia estua izan ostean. Aurten, txapeldun titulua irabazten ahaleginduko da Ardeo berriro ere. Iaz, 19 jasoaldi egin zituen, Bustinzak baino lau gutxiago, eta getxoztarrak berak 2012an egindakoak baino pare bat gutxiago.

Beste lehiakideak

Bustinza eta Ardeogaz batera, honako kirolariak izango dira Leioako norgehiagokan: Jon Loiola Biritxinaga dimoztarra, iaz 20 jasoaldi egin zituena; Arthur Van Der Putten lapurtarra (17 jasoaldi); Jose Lauzurika Fernandez de Gorostiza arabarra, eta Peio Argaia Eizmendi, Patxi Ituarte Salegi eta Lander Otermin Munain gipuzkoarrak.

Kirolak Leioa
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun