Leioako Askartza Claret ikastetxeko 7 urteko ikasle bat domekan eraman behar izan zuten Gurutzetako ospitalera, meningitis B gaixotasuna zeukalakoan. Egoki osatzen dabilen mutikoak sukarra zeukan eta botaka zebilen, "El Correo" egunkariak adierazi duenez. Bitartean, hezkuntza zentroko arduradunek lasai egoteko esan die gainontzeko sendiei, Osakidetzak "neurri berezirik ez" dela behar adierazi ostean.
Martitzenean oharra bidali zien gurasoei Askartza Claret ikastetxeak, lasai egoteko eskatuz: "Osakidetzako Epidemiologia Sailak jakinarazi digu meningitisagatik artatzen dabilela ikaslea; osasun-arduradunek horrelako kasuetarako daukaten protokoloari jarraiki, inolako neurririk hartu behar ez dugula komentatu digute", azaldu zuten hezkuntza-zentroko zuzendariek. Gurutzetako ospitaleko arduradunentzat, berriz, "beste kasu bat baino ez da; urtero haur gutxi batzuek hartzen dute gaixotasuna".
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!