Ekimena Leioako Ekotaldeak antolatu du. Kolektibo hori 16 eta 22 urte bitarteko gazteek osatzen dute. Kontsumo Iraunkorraren Azoka bideratzeko Solasgunearen laguntza izango dute, eragile biak hamaika urtez elkarlanean baitabiltza. Azoka berriro martxan ipintzeko arrazoia honakoa da: «Leioako hiritarrok etxeetan inolako erabilpenik eman gabe pilatzen ditugun objektu horiei guztiei bizitza luzatzeko aukera ematea». Izan ere, kontsumo-espiralaren aurrean, egundoko aukera da partekatzeko, esperientzia komunitarioa bizitzeko eta «beste mundu bat (benetan) posible dela» frogatzeko.
Antolatzaileek azpimarratu dutenez, «ez da trukaketa hutsa hemen proposatzen dena, hori baino askoz ere gehiago da: gauzek sortzen duten beharrizana, horixe balio dute. Niri balio ez didan hori beste pertsona batentzat behar-beharrezkoa izan daiteke. Nahi duzun guztia ekartzeko aprobetxa dezakezu egun hori. Zure irizpidea aske utziz: jantziak, liburuak, musika, altzariak, zapatak, apaingarriak, jostailuak... Ezertarako ezta inorentzako balio ez duela pentsatu arren, gogoratu beste pertsona batzuei balio ahal diela. Hori bai: saiatu objektuak egoera onean egon daitezen». Jakinarazi dutenez, zerbait hartzeko ez da beharrezkoa izango bertan ezer uztea.