Hik Hasi elkarteak zabaldu duenez, gaur egun Euskal Herri osora hedatzen den egitasmoak Gipuzkoan dauka bere egoitza bakarra, baina aurrera begira, Bizkaian ere izateko asmoa du. Hori lortzeko, aipatu bilera egingo dute. Interesa duten pertsona denek parte har dezakete.
Hik Hasi egitasmoa 1995ean sortu zuen irakasle talde zabal batek, euskal hezkuntzaren informazio, eztabaida eta elkargunerako bitarteko izan guran. Egitasmoaren oinarriak honako hauek dira: euskalduna, nazionala, hezkuntza komunitateko partaide denena, baterakoia, irekia, plurala eta independientea.
Bide horretan, Euskal hezkuntza-sistema propioa edukitzeko eskubidea aldarrikatu dute: "euskal kulturan oinarritutako curriculum propioa, irakasleria iraunkor eta euskalduna, Euskal Herritik kanpora hartutako erabakien menpe ez dagoen eredu dezentralizatua eta zentroen autonomia. Horrek guztiak berma lezake kalitatezko euskal irakaskuntza herritar guztiontzat".
Hori dena lortze bidean, Hik Hasik hainbat proiektu gauzatu ditu: izen bereko euskal heziketarako aldizkaria, udako topaketa pedagogikoak, hezkuntza gaiei buruzko monografikoak, Euskal Herriko baliabide pedagogikoen gida, liburuak, haur-jolasen bildumako materiala, musika metodoak, ipuinen bilduma, ikus-entzunezko materiala eta abar luze bat.