Leioako Udalbatzak 2006ko otsailaren 23an onartu zuen, Karmelo Sainz de la Maza jelkidea alkate zela, Hirigintza Antolamendurako Plan Orokorra (HAPO) behin-behinean aldatzea, Lamiako eta Txorierri lotuko zituen igogailua eraiki ahal izateko. Hamar urte igaro dira geroztik, eta udal arduradunek iragarri dutenez gaur egun egitasmoa nahiko bideratuta ei daukate. Eusko Jaurlaritzari dagozkio lehenengo urbanizazio-lanak: maldan gora, igogailua jarri behar duten lekuan zeuden hiru etxeetatik bi daborduko bota daude, Etxebizitza Sailak jabeakaz hitzarmena lortu ostean. "Hirugarren jabeari, ostera, urtarrilaren 7ra arte eman zioten aukera Jaurlaritzak egindako eskaintzari baiezkoa ala ezezkoa emateko. Badaezpada, gizona hortik ateratzeko baimen judiziala dauka Jaurlaritzak", azaldu du Iban Rodriguez alkateordeak. Lehenengo faseko obrak esleituta daude; bizpahiru hilabete barru hastea espero dute.
Lanok sei hilabete inguru iraungo lukete. Gero, igogailua ipintzea Leioako Udalari dagokio; bigarren fase horrek bi milioi euroko aurrekontua dauka. Rodriguezek aitortu duenez, Bizkaiko Garraio Partzuergoak 800.000 euro inguruko diru-partida gordeta dauka horretarako. «Jaurlaritzaren lanak hasi bezain laster aterako genuke igogailuaren lizitazioa, obra batzuk bukatu eta besteak hasteko», udal agintariak aurreratu duenez. Hirugarren fasean, babes ofizialeko etxeak altxatzea aurreikusita dauka Eusko Jaurlaritzak. Change.org-en bidez, 750 lagunek baino gehiagok sinatu dute, igogailua eskatzeko.
Jolas-parkeak estaltzea
Eguraldi txarra egiten duen egunetarako, umeentzako jolas-parkeetako batzuk estaltzea aurreikusi dute udal agintariek. Iban Rodriguez alkateordeak azaldu duenez, "aurreko agintaldian ezin izan genuen egitasmoa aurrera eraman; baina, aurten, gutxienez, bat estali gura dugu". Eskuartean hainbat aukera daukate: "tokian tokiko auzokideakaz berba egin gura dugu, euren leihoen parean estalpea edukitzeko prest egongo liratekeen galdetzeko". Aurrerantzean, udalerriko gune bakoitzean estalitako jolas-parke bat egotea gura dute agintari leioaztarrek. Hori aldarrikatuz, ia 800 sinadura batu dituzte auzokideek.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
