Leioako Askartza Claret ikasketxeak 30 urtez jarraian egin duten ekitaldi batez ospatuko dute Bakearen Eguna; ikasleek, irakasleek eta gurasoek "bakea" berba osatuko dute elkarri lotuta. Hitzordua 10:45ean jarri dute hezkuntza zentroko patioan. Gainera, bakearen aldeko jaia domekara arte (hilak 31) luzatuko da; izan ere, puxikak askatuko dituzte herriko kaleetan zehar, beste hainbat ikastetxe erlijiosoren laguntzaz. Ibilaldia 12:45ean abiatuko da San Joan Bataiatzailea elizatik, eta Leioako Bulevard-ean bukatuko da.
Aurten, ekitaldia Martin Luther King-engan inspiratu da, "I have a dream" (Amets bat izan dut) goiburupean; baita "Euskal Herriaren bake-bidezko elkarbizitzaren aldeko pausoak ematen dabiltzan" pertsonengan ere. Denera, 2 eta 18 urte bitarteko 2.300 ikaslek baino gehiagok, ikastetxeko 200 langilek eta ikasleen aita-ama ugarik parte hartuko dute.
Gorlizen ere domekan, urtarrilak 31, askatuko dituzte puxikak, bakearen alde; hitzordua 12:30ean jarri dute, Elizako plazan. Ekimen hori inguruetako parrokiek antolatu dute.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.