Leioako udal aurrekontuak onartu dituzte EAJk eta PSE-EEk

Iker Rincon Moreno 2016ko urt. 29a, 18:19
Deskargatu Info Ahotsak :

Udal hauteskundeen ostean, hitzarmena izenpetu zuten Leioako EAJk eta PSE-EEk.

EAJk eta PSE-EEk alde bozkatuta, atzoko osoko bilkuran onartu zituzten Leioako Udalaren 2016ko aurrekontuak, ECO Leioa agerkari digitalak gaur jakinarazi duenez. Esnatu Leioak, EH Bilduk eta PPk aurka bozkatu zuten. Oposizioko alderdien artetik, EH Bilduren kontrako jarrera baino ez du jaso aipatutako atariak; osoko zuzenketa aurkeztu zuen koalizio abertzaleak, "kontu horiek ez dietelako erantzuten Leioak dauzkan erronka handienei". Iban Rodriguez Etxeberria alkateordeak (EAJ) HIRUKA komunikazio-taldeari zehaztutakoaren arabera, 2016ko aurrekontu bateratua 35.406.942,50 eurokoa da; 2015ean baino %1,72 handiagoa.

Leioako EH Bilduren berbetan, "herritarren parte-hartze barik egindako aurrekontuak dira; eurak dira sufritzen dutenak". Horren adibidetzat jarri zuten Udalak kiroldegietako tasak igo izana. Salatu zutenez, "azpikontratatutako enpresetan gastatuko den diru-kopurua lau milioi euro baino gehiagokoa izango da; berriro ere esku pribatuetan utziko dute zerbitzu publikoen kudeaketa". Udalkutxari buruz, Udalak "1.029.733,69 euro bueltatu" beharko dizkiola berretsi zuten zinegotzi ezkertiarrek; "hainbat arloren aurrekontuan murrizketak ekarriko ditu horrek", kritikatu zutenez. EH Bildukoen ustez, "atzerakoiak" dira atzo onartutako aurrekontuak.

Zenbakiak

  • Leioako Udalak 33.962.901,32 euroko aurrekontua edukiko du; iaz baino %2,08 handiagoa.
  • Soinu Atadia Fundazioa (Leioako Udal Musika Eskola) erakunde autonomoak 2.201.603,00 euroko aurrekontua edukiko du; iaz baino %4,95 handiagoa.
  • Euskararen Erakundeak (Mastitxu Udal Euskaltegia) 1.090.157,29 euroko aurrekontua edukiko du; iaz baino %2,86 handiagoa.
  • 2016ko aurrekontu bateratua 35.406.942,50 eurokoa da; 2015ean baino %1,72 handiagoa. Udal iturriek azaldu dutenez, aurrekontu bateratua zein den jakiteko barne-transferentzien diru-kopurua kentzen zaio.
Politika Leioa
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun