Lehiaketaren oinarrietan agertzen den legez, antolatzaileek erabakiko dute kontzertu horien datak eta ordutegiak. Hala, metal zein pop-rock sailetako irabazleek 1.200 euroko sari bana jasoko dute. Horrez gainera, euskarazko abestirik onena ere sarituko dute, 600 eurogaz. Aurreko edizioetan bezala, gura duten talde denek sariketan parte hartzeko aukera edukiko dute, disko bat baino gehiago kaleratu eta aurreko edizioetan sari nagusiren bat irabazi dutenek izan ezik. Betiere, gutxienez, taldekide bi 14 eta 35 urte bitartekoak badira. Adin txikikoek gurasoen edo tutoreen baimena aurkeztu beharko dute.
CDarekin batera, parte-hartzaileek izen-emate orria bete eta bidaliko dute, eskatutako datu guztiekin, gutun-azalean ondokoa jarriz: Leioako XVI. Pop Rock Lehiaketa. Aterpe Leioa Gaztegunea. Aldapabarrena, 2. 48940 Leioa. Bizkaia. Diskoan bertan taldeen izena agertzeaz gain kanten izenburuak ere idatzi beharko dira. Horrekin, sanjuanetako finalera igarotzen diren taldeak aukeratuko dituzte.
Sariak
Metal saileko irabazleak 1.200 euro jasoko ditu, Pop Rock kategoriako bandarik onenaren antzera. Lehiaketako talderik onenak, ostera, beste 400 euro jasoko ditu. Bitartean, Udalak 600 euro emango dizkie musikari leioaztar onenei eta Euskara Zerbitzuak beste 600 euro gure hizkuntzan kantarik hoberena aurkezten dutenei. Azken bi horiei ere jaietan jotzeko aukera emango diete. Bi sari horiek maiatzaren 5ean ezagutaraziko dituzte.
Argibide gehiagorako: 944 055 850 / gazte@leioa.net