Obraren "mutilen bertsioa" estreinatu zenetik 20 urte igaro dira; Kike Diaz de Radaren moldaketak Andres Sopeñaren testua du oinarri. Modu horretan, Tanttakak "berriro zabalduko du, 20 urte geroago, eskola nazional katoliko hura; baina, oraingoan, ateburuan, 'Niñas' esaten zuen kartela grabatuta zeukan atetik sartzeko".
"Bertatik sartzen ziren neskak ikastetxera, ama jasankorraren eta emazte eztiaren ezinbesteko etorkizunerako prestatzeko", azaldu dute obraren egileek. Fernando Bernuesen eta Mireia Gabilondoren zuzendaritzapean, "ironiaz betetako egungo begiradatik", Loli Astorekak, Gurutze Beitiak, Teresa Calok, Elena Iruretak eta Itziar Lazkanok "irakasle koipelustre haien esku utzitako hezkuntza-sistemaren biktima izan ziren neskak interpretatuko dituzte". Emakumeek modu bikoitzean jasan zuten hezkuntza-eza: batetik, ikasle gisa; eta, bestetik, andre legez.