Leioako XXII. Arrantzaren Astea jarduera askogaz datorkigu, martxoaren 16tik 20ra bitartean. Gaur, eguaztena, "Especies migratorias en rios cantabricos" bideo-berbaldia eskainiko du Alvaro Antonek, Tamara Morantek, Nuria Olartek eta Loreto Garciak osatutako EHUko fauna-ikertzaile taldeak. Saioa 19:30ean hasiko da, Sakoneta kiroldegiko ikus-entzunezko gelan; sarrera, doan.
Bihar, eguena, "Pesca mar" izango da bideo-berbaldiaren izenburua. Barikuan, berriz, "Pesca rio a duos de grandes truchas" izango da hitzaldiaren izena, Albert Hervias eta Roberto Extremianagaz (euli-arrantzako munduko txapelketan egona, 2014an). Bideo-berbaldi denak 19:30ean izango dira, Sakoneta kiroldegiko ikus-entzunezko gelan.
Bestalde, zapatuan, hilak 19, Elexaldeboluan, Manuel Murillok eta Manolo Barreirok euli eta tresneria desberdinak muntatuko dituzte jendaurrean.
Arrantzaren Astea martxoaren 20an bukatuko da umeentzako arrantza-txango bategaz, Santikurutze Kanpezuko aintzirara.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
