Barikuetan Jai! aisialdian euskaraz gozatzeko aukera eskaintzen duen egitasmoa da, Leioako Euskara Zerbitzuak antolatua. Haur, gaztetxo eta familiei zuzenduta dago eta barikuero garatzen da Kultur Leioako arkupeetan, 17:30etik 19:30era. Egitarauaren barruan ondoko jarduerak egiten dira: jolasak, eskulanak, tailerrak, sukaldaritza, ikuskizunak, dantzak… Udazkenean eta udaberrian izaten dira ekintzak eta Eragintza Kultur Erakundeko lau hezitzailek dinamizatzen dituzte. Antolatzaileek nabarmendu dutenez, "aukera paregabea da lagun berriak egiteko, une dibertigarriak bizitzeko, eta, batez ere, euskararen erabilera sustatzeko".
Programaren helburua da haurrek eta familiek euskara erabiltzea herriko plazetan eta kaleetan, eta horretarako barikuero jarduera bereziak egiten dituzte euskarazko harreman sareak zabaltzeko eta euskara erabiltzeko guneak eta aukerak sortzeko.
Datozen ekimenak
- Urriaren 14an, zirku-tailerra.
- Urriaren 21ean, herri-kirolak.
- Urriaren 28an, kartoi-tailerra.
- Azaroaren 4an, altxorraren bila.
- Azaroaren 11n, munduko jolasak.
- Azaroaren 18an, birziklapen-tailerra.
- Azaroaren 25ean, perkusio-tailerra, Sökolé kolektiboagaz.
- Abenduaren 2an, talo-tailerra.
- Abenduaren 16an, azken jaia.