Vicrilako langile-batzordeak sufritzen dabiltzan egoera larria azaldu zion Mari Carmen Urbieta alkateari. Halaber, Udalbatzak bere jarrera adieraz zezan eskatu zion udal agintariari. Beharginek azaldu legez, Lamiakoko lantegiarentzat hartzekodunen konkurtsoa aurkeztu dute Vicrila enpresako arduradunek, eta lantokia "ixteko arriskuan" dago; horrek zuzeneko 300 lanposturen eta zeharkako beste horrenbesteren galera ekarriko luke.
"120 urte dauzka Vicrilak, eta beti egon da Leioan. Ezinbesteko enpresa da gure udalerrian, ez bakarrik dakarren zuzeneko eta zeharkako enplegu kopuruagatik, eta urte hauetan denetan udalerrian sortu duen balioagatik ere bai. Hori dela-eta, zalantza barik, Leioako herritarren ordezkariok enpleguaren defentsa eta Vicrilaren industria-jardueraren aldeko jarrera garbia erakutsi behar dugu", irakur daiteke onartutako adierazpen instituzionalean.
Ildo horretan, Vicrilako langileei elkartasuna agertu diete, "ziurgabetasun eta zalantza uneak bizi dituzten une hauetan". Lehentxeago aipatutako neurriez gainera, hartzekodunen konkurtso-prozeduran, "enpresak bere egoerari buruzko informazioa emateko ardura hartzea, eta egokia bada, bideragarritasun-plana aurkeztea" eskatuko die Leioako Udalak Vicrilako arduradunei. Bide batez, "udalerriko industria-ehundurari laguntzen jarraitzeko konpromisoari" helduko diote agintari leioaztarrek; Lamiakoko beiragintza-lantegua kokatuta dagoen industria-zoruaren kalifikazioa ez aldatzeko erabakia hartuz, "enpleguari eutsi" gura dio Udalak, eta "udalerrian aberastasuna sortzearen alde agertu".
Vicrila enpresari, bertoko langileen batzordeari eta Eusko Jaurlaritzari bidaliko diete Udalbatzak hartutako erabakiaren kopia.
