Pasa den abenduaren 9tik 18ra egin zen Bizkaiko hiriburuan Bilbao Mendi Film Festival (BMFF) zinema-jaialdiaren bederatzigarren edizioa. Bertan, 47 filmez eta hamaika jardueraz gozatu zuten 9.100 bat mendizalek.
Hilabetearen bukaeran, ostera, jaialdia galdu zutenek Leioan izango dute Bilbon proiektatutako film onenetariko batzuk ikusteko aukera, saritutako batzuk tartean. Hilaren 26an eta 27an, eguaztenean eta eguenean, hiruna film emango dituzte Kultur Leioako auditoriumean, 19:30etik aurrera.
Apirilaren 26an, "Boys in the bugs" (Eskalada-film onena BMFFn), "Dodo’s delight" (kirol- eta abentura-film onena) eta "Blocheads" ikusteko parada izango da. Hurrengo egunean, honako filmak emango dituzte: "Annapurna III. Unclimbed", "Freedom under load" (film onenaren eguzki-lorea irabazi zuen Bilbon) eta "Jean Troilet, toujours aventurier" (Ikusleen Saria). Saio bakoitzeko sarrera 3 euroan erosi ahal izango da, eta egun biko bonua, berriz, 5 euroan.
Film denak euskaraz jarraitu ahal izango dira, azpitituluen bidez. Ekimena Kultur Leioak eta Leioa Mendi Taldeak sustatu dute, eta Leioako mendi-taldeak antolatutako mendi-astearen barruan kokatzen da. "Freedom under load" film eslovakiarrak zinema-aretoetara ekarri du Tatras mendietako zamaketarien historia, Polonia eta Eslovakiako mugan, Karpatoetan. Zehazki, zamaketari horien azken belaunaldiaren gaineko lana da. Pavol Barabas zuzendariak kontatu du, 58 minututan, zergatik hautatu zuten bizimodu hori, eta zergatik jarraitzen duten Europako azken mohikanoak izaten. Barabasek hausnarketa zabala utzi du, bakoitzak soinean daraman zamaren gainean ere zerbait berri topa dezan.
"Freedom under load" filmaren aurrerakina (© K2 STUDIO)
Freedom under load from K2STUDIO on Vimeo.
Ekimenaren kartela
