Erasoa azaroan gertatu zela salatu du emakumeak, eta barikuan atzeman zuten haren ikaskidea. Gainera, beste emakume batzuei ere jazarri ote dien ikertzen dihardu Ertzaintzak. Leioako mugimendu feministak ohartarazi du atxilotua "hiru urtean inpunitate osoz emakumeei erasotzen" ibili dela: "EHUko eraso-sexisten aurkako prebentzio-protokoloa alferrik da", kritikatu dutenez.
EHUko agintariek, ostera, azaldu dute erasoaren zantzuen berri izan zuenean barne-segurtasuneko protokoloa abiatu zuela. Erasoa jasan zuen ikasleagaz harremanetan ipini zirela esan dute, eta Ertzaintzarengana lagundu ziotela ere bai, salaketa ipin zezan.
Unibertsitateak ohar batean jakinarazi duenez, "erabat eta errotik gaitzesten dugu indarkeria sexual mota oro, edozeinen aurkakoa dela ere, eta, errugabetasun-presuntzioari begirunerik handiena erakutsiz, elkartasuna adierazten diogu kasu honetan kaltetutako ikasle andreari, eta haren esanetara ipini gara behar den guztirako". Unibertsitateko arduradunek zantzuen "larritasuna" ikusita, barne-prozedurari ekingo diote. "Errektoretzak arduraz erantzun du, ahal duen guztian lagunduz Ertzaintzari, nola kasuan kasuko epaileari", azaldu dutenez.
Gaitzespen-mezuak
Besteak beste, LAB sindikatuak "erabateko gaitzespena" adierazi du Arte Ederretako ikasleari egindako "erasoa" dela eta. Gertakaria salatzeaz gainera, emakumeari elkartasuna eta babesa adierazi dio. "Ozen esan gura dugu edozein sexu-eraso zein bestelako indarkeria matxistarik ez dugula onartuko", ohartarazi du langileen erakundeak.
Bitartean, "guztion artean unibertsitatea erasorik gabeko esparrua eta berdintasunaren eremua" izatea lortu behar dela adierazi du EHUko Errektoretza-taldeak.