Kirolak  Leioa 2017-09-13 14:32

Leioa Waterpolo prest dago berriro ere lehenengo mailari ekiteko

Leioa Waterpolo klubeko emakumezkoen talde nagusiak urriaren 21ean hasiko du Liga. Etxean egingo du, Horta talde katalanaren aurka. Hala, zazpigarren urtez segidan jokatuko du Lehenengo Mailan. Bere historia osoan, zortzigarren aldia izango da maila horretan lehiatuko dena.

Leioa Waterpolo prest dago berriro ere lehenengo mailari ekiteko
Leioa Waterpoloko jokalariak iaz, Madrilgo Rivas Lehiaketa irabazi ostean. © LEIOA WATERPOLO | Ikusi handiago | Argazki originala

Halere, taldea denboraldia prestatzeko saioetan dabil oraindino. Abuztuaren 30ean hasi zituzten entrenamenduak, eta aste-akabu honetan, Bartzelonan izango dira leioaztarrak Santa Eulàlia klubaren sariketan; bertan, Sant Feliu, Catalunya, Elx eta etxeko AESE taldea izango ditu arerio. Ondoren, hilaren 23an eta 24an, ohiko Gabon Kopan hartuko dute parte. Irailaren azken egunean, ostera, Euskal Herriko Superkopan lehiatuko dira, Zornotzan. Denboraldi-aurrea bukatzeko, lagunarteko partida bi jokatuko dituzte Waterpolo 98'02 nafarraren aurka.

Leioako taldeak jarraipena emango die teknikoei eta jokalari gazteei. Iaz legez, jokalarien gehiengoa leioaztarra izango da, eta den-denak bizkaitarrak. Izan ere, 15 kideetatik 12 Sakonetako harrobitik atera dira. Hala, Jon Lópezek segituko du taldea zuzentzen, Gorka Sánchez eta Josu Barrenetxea teknikoakaz batera, azken bost urteotan legez.

Taldearen helburua da iaz agertutako maila sendoa mantentzea, bosgarren lekua erdietsita; horretarako, etxean jokatuko dituzten partidak mendean izan beharko dituzte. Aurreko denboraldian, dema bat baino ez zuten galdu Sakonetan. Halere, leioaztarrek sekulan ez diote uko egin anbizioa izateari, orain dela denboraldi biko hirugarren postuak frogatu zuen legez.

Partidak Sakonetan

Urriak 21, zapatua

  • Leioa Waterpolo vs UE d'Horta, 18:00etan.

Azaroak 18, zapatua

  • Leioa Waterpolo vs Concepción - Ciudad Lineal, 18:00etan.

Abenduak 2, zapatua

  • Leioa Waterpolo vs Las Encinas de Boadilla, 17:00etan.

Urtarrilak 13, zapatua

  • Leioa Waterpolo vs CN Cuatro Caminos,17:00etan.

Otsailak 3, zapatua

  • Leioa Waterpolo vs CW Elx, 18:00etan.

Otsailak 24, zapatua

  • Leioa Waterpolo vs CN Catalunya, 17:00etan.

Martxoak 10, zapatua

  • Leioa Waterpolo vs CDN Boadilla, 17:00etan.

Apirilak 7, zapatua

  • Leioa Waterpolo vs AE Santa Eulàlia, 17:00etan.

Apirilak 28, zapatua

  • Leioa Waterpolo vs Waterpolo '98'02, 18:00etan.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa