"Daborduko Espainiako Gobernuak EAEn daukan ordezkariak eskaera egin zigunean hainbat zalantza sortu zitzaizkigun. Gutierrezen aldeko errotulua eta oroitarria jabetza pribatuko guneetan ipinita daude", azaldu du udal-agintariak. Horrez gainera, "nahiko bihurriak" ziren eskaera hori egiteko argudioetako batzuk, Urbietaren berbetan: "Bide publikoaren erabilera eta garbiketa eta herritarren elkarkidetza arautzeko ordenantza ipini zuten mahaiaren gainean", azaldu duenez. Orain, Bilboko Administrazio Auzitegiko 1. Epaitegiak plazaratutako sententziari aurre egiteko, helegitea aurkeztuko dutela iragarri du Leioako alkateak; EAEko Auzitegi Nagusian aurkeztuko dute. "Leioako Udalak dauzkan prozesu judizial guztietan bezala, azken hariraino eroango dugu kontua", amaitu du Urbietak.
GALek hil zuen
Eugenio Gutierrez Salazar "Tigre" 1984ko otsailaren 25ean hil zuen frankotiratzaile batek, errefuxiatu-talde bategaz Zuberoako Idauze-Mendi udalerriko baserri batean zegoela. Euskara-ikasketen atsedenaldian baserriaren atarira irten zenean tiro bat jaso zuen eta bertan gelditu zen hilik. Hilketa GALek beregain hartu zuen, baina orain arte inor ez da akusatua izan bere heriotzagatik. 29 urte zituen leioaztarrak.
2003ko azaroan, Guardia Zibilak terrorismoari buruz abiatu berria zuen webgunean, lehenengo aldiz onartu zuen Estatu espainiarrak Gutierrez eta beste 27 euskal herritar "GALen ekintza terroristen" biktimak izan zirela. El Mundo egunkariak hori salatu eta ordu batzuetara aipatu zerrenda kendu egin zuten. "Tigre" Leioan jaio zen 1955eko urtarrilaren 14an eta ETAko zuzendaritzako kidea izatea leporatu zioten.