Jendartea  Leioa 2017-11-23 16:22

Gazteek sexu-erasoei ez, Leioan

Azaroaren 25eko ekimenen artean, ohi den legez, Leioako hainbat ikastetxetako neska-mutilek ere salatu egingo dute emakumeenganako indarkeria; Udalaren Berdintasun Saila hezkuntza-zentroakaz elkarlanean dabil, hainbat ekintza aurrera eroateko. Berbarako, bariku honetan, azaroaren 24an, eurentzat beren beregi deitutako kale-agerraldian parte hartuko dute 500 ikaslek baino gehiagok. Elkarretaratzea 12:00etan izango da, Boulevarden.

Gazteek sexu-erasoei ez, Leioan
Aurten kontzentrazio bi egongo dira: bata, barikuan, ikasleek parte har dezaten; bestea, zapatuan. | Ikusi handiago | Argazki originala

Jarduerei jarraituz, udalerriko ikastetxe denetan egingo dute tapoi-batzea, 2018ko maiatzera arte; batutako tapoiak diruagaz trukatuko dituzte. Horregaz batera, "Jaia geurea, gauean ere bai" goiburua erabiliz, kartel-lehiaketa antolatu dute; ikastetxe denen artean egingo da eta kartel irabazlea 2018ko jaietan erabiliko da eraso sexisten kontrako irudi legez. Modu berean, hezkuntza-zentro irabazleak tapoi-bilketan lortutako dirua jasoko du, Amaia Celis berdintasun-teknikariak azaldu duenez.

Bestalde, Andrak emakumeen elkarteak Udalagaz batera egingo ditu ekitaldiak. Hala, gaur, eguenean, azaroaren 23an, Emakundek ekoitzitako "Volar" dokumentala ikusteko aukera egongo da, 19:00etan, Kultur Leioako entzungelan. Gonbidapenak Gizarte Zerbitzuen egoitzan jaso daitezke. Bestalde, zapatuan, azaroaren 25ean, elkarretaratzea egingo dute, Boulevarden, 12:00etan. Ekimen berriei dagokienez, azaroaren 24ra arte, Indarkeriaren kontrako alderantzizko graffitiak ikusteko aukera egongo da; lekua eta orduak ez dituzte zehaztu oraindino. Azkenik, Kutxa morea postontzi birtuala zabaldu du Udalak, bere webgunean; leioaztarrek emakumeenganako indarkeriaren kon­trako mezuak idatzi ahal izango dituzte bertara helarazteko.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa