Gabonetako Soinuak, Bilboko Koral Elkarteak Bizkaiko Foru Aldundiaren eta La Caixa Gizarte Ekintzaren lankidetzagaz antolatutako kontzertua, egun seinalatua da abenduko egutegian. Aurreko edizioetan izandako arrakastak bermatuta, bertoko talenturik gazteena berriz izango da, Gabonetan, Bilboko eszenan.
Aurkezpenean, Lorea Bilbao Euskara eta Kulturako foru-diputatuak adierazi zuenez, "Gabonetako Soinuak kategoria handiko kontzertua da eta bertan kalidade oso handiko umeen ahotsek argi erakusten deuskue talentua bizirik dagoala Bizkaian, ezelango duda barik Bizkaiko ahotsek etorkizuna daukiela eta, horren guztiaren adibide txikia gaur aurkezten dogun musika-ekitaldia da, gaztetasuna, talentua eta kalidadea batzen dauzana".
Kontzertuari hasiera emateko, Bilboko Koral Elkarteko ahots gazteenek, Anus Cividian piano-jotzaileak lagunduta, ondoko abestiak kantatuko dituzte: A. Snyderren "Amani", L. Cohenen "Hallelujah", R. L. Hughen "Clear Water", R. E. Schramen "Sing We All Noel", J. Rutterren "The Colors of Christmas" eta J. Elberdinen "Bidetik datoz". Jarraian, José Luis Ormazábalek Basilio Astulezi emango dio makila, eta honek, Itziar Barredo piano-jotzaileagaz, Ander Lekue perkusionistagaz eta Kantika Koralagaz batera, ondoko obrak eskainiko ditu: M. Smileyk moldatutako "Bring me Little water, Silvy", E. Esenvaldsen "Spring, the sweet spring", E. Podgaitsen "Benedictus", X. Sarasolaren "Identity", J. Felicianoren "Feliz Navidad", E. Laschkevitzek editatutako "Samba Lelê" eta Beyoncéren "Single Ladies". Ondoren, Gaudeamus Koralak, Julia Foruriaren zuzendaritzapean, Gabon-kanta hauek abestuko ditu: "El Tamborilero" eta "Carol of the bells", J. Elberdinek harmonizatuta; Handelen "Hallelujah"-ren M. Warren eta M. O. Jacksonen bertsioa; eta doinu tradizionalak, hala nola, A. Werinen "Suo-gân" sehaska-kantaren R. E. Scharamen moldaketa, eta I. Gonzalez eta U. Sorazuren "Neguaren Baita". Gaudeamus Koralak ondoan izango ditu, oholtzan, Jon Artetxe piano-jotzailea, Xabier Gabiola tronpeta-jotzailea, eta Irati Zabala eta Nerea Quincoces perkusionistak. Amaiera emateko, hiru koruek elkarregaz abestuko dute Juan Tony Guzmánek moldatutako "Cantemos a María".
Egitarauak leku eta garai oso desberdinetan zeharreko ibilbidea egingo du, eta Gabonetako bero nahasezina transmitituko die Euskalduna Jauregiko entzunaretoan izango diren ikusleei, bi mila baino gehiagori. Kontzertuan, txikienen ilusioak helduak kutsatuko ditu, eta giro magikoak guztiak bilduko ditu.