Urratsez-urrats, Euskal Herriko geologiak gordetzen dituen iraganeko pasarteak irakurriz, gure paisaia ulertzera lagunduko digun dokumental dibulgatiboa da "Lurraren bidean". Aranzadi Zientzia Elkartearen eta EHUren gidaritzapean ekoiztu dute, Bizkaiko Foru Aldundiaren, Leioako Udalaren, Otxoa de Barandika Fundazioaren eta EITBren kolaborazioagaz. Milioi urtetan zehar bidaiatuz, itsaso tropikaletik glaziarretara pasaz, itsas-sakoneko eremuetatik laku ertzetara irristatuz, bizi gareneko lurrari argia emango dion ikus-entzunezkoa ekoiztu du ikertzaile eta kultur eragile anitzek osaturiko lantaldeak.
"Lurraren bidean" dokumentala estreinatuko dute eguen honetan, otsailaren 1ean, Kultur Leioan. Hitzordua 19:00etan ipini dute, eta sarrera doakoa izango da. Hori gutxi balitz, bertaratzen diren guztiei dokumentalaren ale bat emango zaie; "proiektuaren xedea ahalik eta jende gehienak ikustea eta ikastea da", arduradunek adierazi dutenez. Hain zuzen ere, proiektua Euskal Herriko ikastetxeen artean zabaltzen dabiltza; material didaktiko gisa erabil daiteke.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun