"13th Avenue South" Nashvillen (Tennessee, AEB) egin du Trabellin' Brothers blues-seikoteak: Brad Jones handiak grabatu eta ekoiztu du, Alex The Great Recording estudioan, eta Jim DeMain-ek masterizatu du Yes Master Studios-en, 2017ko azaroaren 20tik 30era arte. Barikuan salgai ipiniko dute.
Hamar abestik osatzen dute Leioako taldearen lan berriak: horietatik bederatzi jatorrizkoak dira eta hamargarrena Robert Johnson abeslaria zenari egindako omenaldia da. Kantak ohitura zaharrei jarraituz grabatu dituzte: arima daukan aspaldiko estudio batean, denak batera areto berean jotzen, ahotsa barne. Euren estiloari jarraituz, Amerikako erraietatik sortutako musikan barrena bidaia egitea proposatzen digute: bluesetik abiatuta, gospel, swing, jazz, folk, "zideco", "cajún", soul eta country bezalako estiloetatik igaroz, New Orleanseko berezko doinuetan amaituz.
Diskoa grabatzeko, bereziki, musikari biren laguntza izan dute: Alex Schultz New Yorkeko gitarra-jolea eta Earl Thomas Tennessee-ko abeslaria. Horrez gainera, Nashvilleko musikaririk ezagunenak parte hartu dute hainbat abestitan: Steve Conn akordeoi-jolea, Jamison Sevits tronpeta-jolea, Josh Scalf tronboi-jolea, Etta Britt abeslaria eta Brad Jones bera, harmonika joaz.