Sakonean

Lamiakoko ibarra: gotorleku bat naturarentzat

© JOSE IGNACIO TORRES

Ahalegindu zaitez Urdaibai erraldoi bat irudikatzen. Halakoxea izango zen Ibaizabal itsasadarra, urbanizatzeak natur arrasto gehienak desagerrarazi arte. Lamiakoko ibarraren zati bat da iraun duen gune bakarra; oraintsu arte mehatxupean egon ostean, biziraupenerako atea zabaldu zaio berriki.

Zer balio du guneak?

Gaur egun balio ekologiko eskasa du Lamiakoko ibarrak. Txikia denez, berreskuratzeak ez luke izugarrizko inpaktua ingurumen aldetik, baina heziketa-gune interesgarria litzateke, eta balio sinboliko handia ere edukiko luke.

Aspaldiko eskaria

Lamiakoko Ibarraren Defentsarako Plataforma 2003an hasi zen gunea kontserbatzeko neurri eske. Bilbao Bizkaia Ur Partzuergoak maiatzean baztertu zuenetik bertan makro-araztegi bat eraikitzea, hurbilago dute helburua.

Udalaren esku

Abuztuan, Leioako agintariek ibarrerako plan paisajistikoa garatzeko asmoa agertu zieten ekologistei. Xehetasunik ez da zabaldu oraindino, baina hainbat hedabidetan aipatu da itsasadarreko errepidea itxiko lukeela Udalak.

Hegaztien "geltokia"

Kantauri itsasoko itsasadar guztiak, baita Ibaizabalekoa ere, egokiak dira migrazioa egiten duten hegaztientzat. Atseden hartu eta elikatzeko pausaguneak dira, eta kasu batzuetan negu osoa igarotzen dute hemen, bertoko espezieakaz batera. 

Errepidea kendu

Ekologistek itsasadarreko errepidea eraisteko eskatzen dute, marea ibarrera sartu dadin. Era berean, lurra kendu eta urak berak paisaia birmolda dezala gura dute. "Lasai utziz gero, naturak berrosatzeko gaitasuna du", azaldu dute. Oinezko eta bizikletentzako pasabidea eraikiko litzateke, eta auto-trafikoa Felipe del Río kalera eroan.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun