Foru Ogasunak edo Udalkutxak izan dituzten diru-sarrera handiagoen ondorioz da handiagoa aurtengo aurrekontua: erakunde biek aurreikuspenak gainditu dituzte; horrez gainera, Udalek zergengatik eta tasengatik edukitako diru-sarrerak handiagoak izan dira, agintari leioaztarrek azaldu dutenez. Udalkutxaren ondorioz Udalak izan duen igoera 1.186.434 eurokoa da.
Partida garrantzitsuenen artean, diru-sarreren atalean (7. kapitulua. Kapital Transferentziak) %59ko hazkundea azpimarratu behar da, hau da, 1.366.137 euroko sarrera. Diru-sarrera horiek Eusko Jaurlaritzatik (ikastetxeetan egindako irisgarritasun, egokitzapen- eta mantentze-lanak, garapen jasangarria eta ingurumen-arloetako inbertsioak), Bizkaiko Garraio Partzuergotik (Txorierriko igogailuan egindako inbertsioa) eta Bilbao Bizkaia Ur Partzuergotik (horniduragaz eta saneamenduagaz erlazionatutako lanak) datoz.
Modu berean, inbertsioen atalak ere %33,5eko hazkunde garrantzitsua erakusten du, 4.511.786 eurora iritsiz, udal-aurrekontu osoaren %11,83, hain zuzen ere. Alor horretan, partida garrantzitsuena Auzoak Eraikiz programara bideratzea aurreikusten da, auzoetako mugikortasuna eta irisgarritasuna hobetzeko helburuz.
2019ko beste jarduketa garrantzitsuenetako batzuk argiztapen publikoan, umeentzako ekipamenduetan eta bio-osasungarrietan, kirol eraikinetan eta instalazioetan egin beharrekoak izango dira, eta Herri Antolamenduko Plan Orokor (HAPO) berriaren aurrerapenean eta egin beharreko azterlanetan eta proiektuetan ere bai, hiri-birgaikuntzako lanak ahaztu barik.
2019ari begira, 900.000 euro bideratu dira Aurrekontu Irekiak programara.
- Aurrekontu gehien izango duten jarduketak hauek izango dira:
- Ikastetxeei emango zaizkien diru-laguntzak.
- Ohitura osasungarriakaz eta bizikidetzagaz erlazionatutako programak.
- Euskararen sustapenerako laguntzak.
- Enplegagarritasunari laguntza.
- Enpresen eta merkataritzaren lehiakortasunaren sustapena, identifikazioa eta aholkularitza finantzaketaren bilaketan, merkataritza-sektorerako programa espezifikoen garapena, laguntasuna soluzio teknologikoetan.
- Kultura ekintzailearen sustapena.
- Harrerako etxebizitzak etxeko indarkeriaren biktima diren emakumeentzat eta baztertuta geratzeko arriskuan dauden pertsonentzat.
- Aurrekontu handiagoa gizarte arloko larrialdi egoeretarako eta umeen tratamendu psikologikorako.
- Programa berri bi, adinekoengan bakardadea hautemateko eta osasunaren prebentziorako eta babeserako.
- Artatza Jauregian gizarte eta kultura izaerako jarduera berriak sustatzea.
- Aterpe Leioa Gaztegunearen jardueren hedapena.
- Umore Azoka indartsuagoaren ospakizuna, 20. urteurrena dela eta.
- Balioetan oinarritutako hezkuntza.
- Aurrekontu handiagoa berdintasunerako, emakumeenganako indarkeriaren eta desberdintasunaren prebentziorako kanpainak zabaltzeko.
- Herri-jaietarako aurrekontuen hazkundea.
- Hobekuntzak kirol instalazioetan.