Leioako tabernek ordubete beranduago itxi ahal izango dute Gabonetan

© LEIOAKO UDALA

Leioako ostalaritza-lokalek ordubete gehiago zabaldu ahal izango dute urtarrilaren 6ra arte, Gabonetako jaiak direla eta. Erabaki hori Eusko Jaurlaritzaren 2012ko martxoaren 13ko dekretuan oinarritzen da. Dekretu horrek ikuskizunen eta ostalaritza-establezimenduen ordutegiak ezartzen ditu, eta Udalei ordutegi bereziak ipintzeko aukera ematen die, festak edo jai-ekitaldiak direla eta.

Bigarren taldean dauden tabernen, kafetegien, erretegien, txokoen eta gainerako gastronomia-elkarteen kasuan, goizaldeko 02:00ak arte ireki ahal izango dituzte ateak astegunetan, eta 03:30ak arte barikuetan, jaiegunetan eta jai-bezperetan. Hirugarren taldeko taberna bereziak, pubak edo diskotekak 03:30ak arte egon ahal izango dira zabalik astegunetan eta 05:00ak arte barikuetan, jaiegunetan eta jai-bezperetan.

Horregaz batera, Udalak denen laguntza eskatu du, Gabonetako jaiak ahalik eta ondoen joan daitezen.