Mendibile Jauregiak Eskerrik Asko saria emango die hiru herri-kirolariri

Aitzol Atutxa aizkolaria izango da saria jasoko dutenetako bat. CC BY SA-PILOTAPEDIA

Aitzol Atutxa aizkolariak, Jose Martin Bustinza Tubi lasto-altxatzaileak eta Fausto Muguerza erretiratutako aizkolariek Mendibile Jauregia Elkarteak ematen duen esker oneko saria jasoko dute eguenean. Horregaz batera, herri-kirolaren gaineko irudi-erakusketa berria aurkeztuko dute.

"Euskal ohiturak eta kultura proiektatzen dituztenei" ematen dizkie Mendibile Jauregiak Eskerrik Asko sariak, Eusko Jaurlaritzaren, Bizkaiko Foru Aldundiaren eta Leioako Udalaren babesagaz. Esangura berezikoa da herri-kirolean dabiltzan edo ibili diren hiru pertsonari ematea, jauregiak berak herri-kirolen gaineko erakusketa iraunkorra du eta. 

Saridunen ibilbidea

Aitzol Atutxa dimoztarra Euskal Herriko aizkolaririk garrantzitsuenetakoa da. Mendibilek azaldu duenez, "30 titulu ditu Euskadiko txapelketetan eta gaur egun bost aldiz txapelduna da". Herri-kirolean ibiltzeaz gain, txakolin-ekoizpenagaz duen zerikusia ere azpimarratu dute, mahastiak dituen familia bateko kidea da eta. Kontuan izan beharra dago Bizkaiko Txakolina jatorri-izendapenak ere parte hartuko duela sari-banaketan.

Aizkolaria da Fausto Muguerza ere, baina erretiratua, eta altuerako mozketan espezialista. Bakarretakoa, izan ere. Hain zuzen, hura izan zen Mendibileko herri-kirolen gaineko erakusketaren bultzatzaileetako bat, 2014an.

Jose Martin Bustinza Tubi-ri dagokionez, Euskal Herriko lasto-altxatzaile nagusia dela esan liteke lasai asko. Euskadiko Txapelketa zazpi bider irabazitakoa da, beste inor baino gehiago.

Erakusketa berria

Sari-banaketaren ekitaldia herri-kirolak ardatz izango dituen beste erakusketa bat aurkezteko baliatuko dute. Javier Moure artistak egindako margolan, zirriborro eta argazkiak izango ditu ikusbide erakusketa horrek.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun