Askartzaren Gabon Kopa waterpolo-lehiaketak 30. edizioa beteko du asteburuan

Denbora aurrera doa eta konturatu orduko 30. ediziora ailegatu da Claret Askartza klubak antolatutako Gabon Kopa. Hori ospatzeko gogoz, izen handiko arerioak ekarri gura izan dituzte aste-akabu honetako partiduetarako.   

Txapelketaren lehenengo edizioan (1990ean) jokatu zuten partiduaren errepikapena izango da zapatuan eta domekan egingo den Gabon Koparen momenturik esanguratsuenetako bat.  Orduko hartan CN Isla taldeagaz neurtu zituen indarrak Askartzak, eta horixe izango da zapatu iluntzean, 20:45ean, jokatuko den partidua.

Horrez gain, gizonezkoen txapelketarako espainiar waterpoloaren Ohorezko Mailan diharduten talde bi ekarriko dituzte, Sant Andreu eta Navarra, Gabon Kopan sarritanparte hartu duen Rubí taldeaz gain. Askartzak berak osatuko du laukotea, jakina. "Goi-mailako waterpoloa ikusiko da igerilekuan", Javi Cortés Askartzako entrenatzailearen berbetan.

Emakumezkoen lehiaketa, berriz, umeen mailakoa izango da, eta horretan Santoña eta Olivar taldeak egongo dira Sant Andreu eta Askartzagaz batera. Bai gizonezkoen bai emakumezkoen mailetan denek denek kontra jokatuko dute aste-akabuan zehar. Klubaren webgunean ikus daiteke egitarau zehatza.  

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun