Bulebarraren zati bat oinezkoek bereganatuko dute domekan, Autorik Gabeko Egunean

Oinezkoen Pausura ibilaldiaren aurreko edizio bat; hamabosgarrena egingo dute bihar. © LEIOAKO UDALA

Astelehenetik Mugikortasunaren Astean murgilduta dago Leioa. Ekimena burutzeko, domekan, Autorik Gabeko Nazioarteko Egunean, Bulebarraren aldeetako bat autoentzat itxi eta hainbat jarduera egingo dituzte eguerdian.

Europa osoan Autorik Gabeko Egunak emango dio amaiera Mugikortasunaren Asteari. Iaz, esaterako, hogei herrialdetako 2.700 hiri ingurutan egin zen ekimena, baita Leioan ere. Aurtengo asmoa Bilborantz doan Bulebarraren ondoko errepidearen aldea ixtea da.

Autoek libre utzitako espazio horretan jarduera ugari egingo dute 11:00etatik 15:00etara, mugikortasun aktiboarekiko sentiberatasuna sortzeko asmoz: parkour-tailerra, herri-kiroletan oinarritutako jolasak, txikientzako oztopodun ibilbideak, erakusketak...

Bihar, bestalde, Oinezkoen Pausura ibilbidearen hamabosgarren edizioa egingo dute. Goizeko 11:00etan izango da abiatzea, Sakoneta kiroldegian; aurtengo goiburua, Leioa Aktiboa! "Helburua herritarrak pertsona guztientzako mugikortasun aktiboagoa eta osasungarriagoa nola bultza daitekeen pentsatzera animatzea da", azaldu du Udalak.