Udal-gobernuan dauden alderdien, hau da, EAJren eta PSEren aldeko botoakaz onartu dira aurrekontuak. Beste hiru taldeak (EH Bildu Elkarrekin Podemos-Esnatu Leioa eta PP) abstenitu egin dira. Popularren kasuan, euren zinegotzi bakarrak oraindik orain hartu du kargua (osoko bilkura berean, izan ere) eta ez du astirik izan aurrekontu-proposamena lantzeko. EH Bilduk eta Elkarrekin Podemosek, berriz, euren zuzenketa batzuk onartu izanagatik ez dute aurkako botorik eman. Denera, oposizioaren hamasei zuzenketa onartu dira, aurrekontuaren 543.000 eurori eragiten dietenak.
Gobernuko alderdiei dagokienez, aurrekontuak aurrera ateratzeko oposizioagaz egindako negoziazioen garrantzia nabarmendu dute bai Iban Rodriguez alkateak, bai Ugaitz Zabala EAJren bozeramaleak, baita Juan Carlos Martinez PSEkoak ere. "Bilera emankorrak izan dira, urte osoan mantendu gurako nituzkeenak", adierazi du alkateak. Ordezkari sozialistak, bere aldetik, mota horretako kontsentsuak sarriago lortu beharko liratekeela esan du, eta gogorarazi Leioako historiako aurrekonturik handienak direla onartutakoak.
Elkarrekin Podemosek eta EH Bilduk eskertu egin dute aurrekontuez eztabaidatzeko izandako elkarrizketa-giroa, nahiz eta alderdi moreak "beste baterako gaia lantzeko denbora luzeagoa" izan gurako lukeela ñabartu. Edozein kasutan, hiri-ortuak sortzeko eta birziklatze-paperontziak ipintzeko aurkeztutako zuzenketak onartu izana nabarmendu du Jose Ignacio Vicente haien bozeramaleak. EH Bilduko Asier Izquierdok, berriz, esan du onartutakoak ez direla bere taldeak diseinatuko lituzkeen aurrekontuak, baina eskertzekoak direla udal-gobernuak izandako jarrerak eta hartu-emana.