Datorren urteko udal-aurrekontuei ekarpenak egiteko epea zabalduko dute astelehenean

Otsailaren 10etik martxoaren 1era, 16 urtetik gorako Leioako biztanleek 2021eko udal-aurrekontuei ekarpenak egiteko aukera izango dute. Datorren astean prozesuaren nondik norakoak azaltzeko berbaldiak emango ditu Udalak, eta hurrengoan karpa ipiniko dute udalerriko hainbat lekutan, proposamenak zuzenean jasotzeko.

Udalak gaur emandako prentsaurrekoan iragarri dutenez, otsailaren 10ean hasiko da Leioan erroldatutakoek ekarpenak egiteko epea. Hainbat bide egongo dira horretarako: Herritarrentzako Arreta Bulegoan edo herrian dauden parte-hartzerako hamabost postontzietako batean inprimakia ematea, Udalaren Gobernu Irekiaren Atarira jotzea, edo beren-beregi ipiniko ditizten karpetan ekarpena uztea. Honako egunetan egongo da aukera karpetara joateko: otsailaren 18an, goizez Leioako metro-geltokiaren ondoan eta arratsaldez Sakonetan; otsailaren 19an, goizez Lamiakoko metro-geltokiaren ondoan eta arratsaldez Txorierrin; eta otsailaren 20an, goizez Pinuetan eta arratsaldez San Bartolomeko Kulturgunean. Proposamenak jasotzeaz gain informazioa emango zaie hala eskatzen dutenei.

900.000 euroko aurrekontua

"Auzotarrek Leioako behar nagusiak ezartzea" da prozesuaren helburuetako bat, Udalaren esanetan. "Herritarrak gizarte-bizitzaren protagonista aktibo bihurtu nahi ditugu, eta demokrazia parte-hartzailean sakondu". Zehaztu dutenez, aurtengo aurrekontuetako 900.000 euro bideratuko dira prozesu horretarako.

Datorren astean berbaldiak egingo dituzte Nagusien Etxeetan, prozedura azaltzeko. Hitzorduak otsailaren 10ean (Txorierrin), 11n (Lamiakon), 12an (Errekalden) eta 13an (Pinuetan) izango dira, denak 19:00etan. Beste alde batetik, zalantzak argitzeko whatsapp kanal bat ere egongo da. 

Hurrengo faseak

Martxoaren 1ean amaituko da herritarrek proposamenak egiteko epea, eta ostean horien azterketa egingo dute udal-teknikariek, bideragarriak zeintzuk diren erabakitzeko. Hirugarren fasean, herritarrek aste biko epea izango dute (ez dute zehaztu noiz) aukeratutako proiektuetatik (8-12 inguru) lehentasuna zeintzuk izango duten bozkatzeko. Azkenik, bozketaren emaitza jakinaraziko da kanal publikoen bitartez. 

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun