Lertutxeko urtegia mantendu dadin sinadurak biltzen hasi dira

"Lertutxe, aintzira bai" goiburua erabilita, change.org webgunean sinadurak batzen hasi dira, Leioako campusetik hurbil dagoen urtegi hori desagerraraz ez dezatela eskatuz. Ekimena abiarazi dutenen esanetan, urtegiaren presan arrakala bat agertu da, eta eremuaren ugazabak, Dow Chemical enpresak, urtegia deuseztatu gura du konponketari ez ekitearren.

"Lursail hori Udalari uzteko saiakerek ez dutenez aurrera egin (inork ez du konponketa bere gain hartu gura), Dow Chemical enpresak aintzira suntsitzea erabaki du, haren fauna eta landare guztiakaz", dio sinadura-eskariagaz batera argitaratutako testuak. Zehazki, EHUren Bizitzaren Basoa monumentuaren ondoan dago Lertutxe (urtegia lehenago zegoen, dena esatera).

Bertan urte osoa bizi diren hainbat hegazti-espezieri eta migrazioetan geldialdia hantxe egiten duten beste batzuei egingo lieke kalte Lertutxe desagertzeak, adierazi dutenez. Baita hainbat arrain, dortoka, ugaztun txiki eta abarri ere. "Orain herritar askok gozatzen dugun inguru horren ordez, salgai ipiniko duten landa-eremua egongo da", zehaztu dute, "eta inguruko ortuak ere kenduko dituzte; hala, horien ugazabek, 41 eguneko epean eta konfinamendu betean, bertako animaliak fruta-arbolak... eroan beharko dituzte, galdu gura ez badituzte".    

Bizkaiko Foru Aldundiari eta Dow Chemical enpresari egin diete eskaria.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun