Leioa Waterpolok Espainiako maila gorenean jokatuko du datorren denboraldian

© LEIOA WATERPOLO

Leioa WLB taldea mailaz igo da, Espainiako Waterpolo Federazioak erabaki baitu koronabirusaren ondorioz lehiaketa bertan behera geratu aurretik Lehen Mailako (izatez, estatuko bigarren maila) ligako sailkapeneko lehenengo biak izatea datorren denboraldian Ohorezko Mailan jardungo direnak. Izan ere, une hartan bigarrena zen Leioa WLB. 

Hala, sortu zenetik lehen aldiz Preemaat Ligan (babesletza-arrazoiengatik izen hori du gaur egun) jokatuko du Leioa Waterpoloren emakumezko talde nagusiak. Klubaren esanetan, igoera gertakari historikoa da, eta sekulako balentria, Espainiakoa munduko ligarik onenetakoa baita emakumezkoen waterpoloaren esparruan: "Hor jokatzen dute gaur egungo Europako txapeldun gehienek". 

Leioa izango da Premaat ligan (gizon zein emakumezkoenean) taldea duen udalerririk txikiena, eta Euskal Herriko bakarra. Klubak argitu duenez, orain arte Ohorezko Mailan jardun duten ia talde denak Madrilgoak eta Kataluniakoak izan dira.     

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun