Bihartik aurrera zabalik egongo dira berriro hainbat kirol-instalazio

Sakonetako kiroldegiko harrera-gunea. © LEIOAKO UDALA

Leioako Udalak bere webgunearen bidez iragarri du bihar, ekainak 17, Sakonetako udal-kiroldegiko zerbitzu batzuk eta Torresoloko padel-pista zabalduko dituela. Osasun-egoeragaz bat etorrita, erabiltzaileek zenbait ezohiko arau bete beharko dituzte.

Sakonetan, hain zuzen, harrera-gunea, muskulazio-gela eta kirol-kantxa zabalduko dituzte. Udalak azaldu duenez, "abonatuek padel-pistak erreserbatu ahal izango dituzte gaurtik bertatik, fitness-jardueraren erabiltzaileek bezala. Erreserba horiek ordubetekoak izango dira, eta erreserba formalizatu eta hurrengo egunera arte ezingo da beste bat egin, erabiltzaileen txandakatzea errazteko". Hitzordua telefonoz egin beharko da, eta laster sistema telematikoa ere ipiniko dute zeregin horretarako.

COVID-19ak eragindako egoera dela eta, zenbait protokolo ezarri dira, Udalak zehatu duenez: "Edukiera murriztuak, aurretiko hitzordua hartzeko beharra, soilik abonatuek erreserbatzeko aukera, eta instalazioen itxiera lanaldiaren erdian desinfekzio-lanetarako".

Bestalde, kiroldegiak itxita egon diren denboran egokitzapen- eta desinfekzio-lanak egin dituztela adierazi dute, "aurten Sakoneta abuztuan ere zabalik egon dadin". Kiroldegi barruko igerilekuak eta Torresoloko kanpoko aldekoak berriro zabaltzeko lanean dabiltzala gaineratu dute, "abonatuek igerilekuak datorren astetik aurrera erabiltzen hasteko helburuarekin."

Udal-webgunean ikus daitezke, xehe-xehe, Torresoloko padel-pisten araudia eta Sakonetako muskulazio-gunearena.

 

 

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun