Aire zabaleko ekitaldiak antolatu ditu Kultur Leioak uztailerako

Funes Troup konpainia San Bartolome eskolan izango da uztailaren 15ean. © XABI LARREA

Ezohiko uda honetarako kultur programazioa osatuz dabiltza eskualdeko udalak. Kultur Leioak jakinarazi duenez, uztailean zehar aire zabaleko hainbat emanaldi eskainiko dituzte, osasun-araudia betetzeko. Hala, aste-akabuetan lau film egongo dira ikusbide Aldapa entzunaretoan, eta hilaren 15ean hainbat ekitaldi egingo dituzte auzoetan.

Pelikulak bariku eta zapatu gauez emango dituzte, 22:30ean hasita. Sarrera doakoa izango da, eta osasun-neurriak betearaziko dira. Honenbestez, derrigorrezkoa izango da maskara erabiltzea, besteak beste.

Hauek dira programatutako filmak:

Uztailak 3-4

  • Yesterday. 116 min. Gaztelaniaz. Denentzat.

Uztailak 10-11

  • Asterix. Edabe magikoaren sekretua. 86 min. Euskaraz. Denentzat.

Uztailak 17-18

  • El viaje de Marta. 83 min. Gaztelaniaz. 7 urtetik gorakoentzat.

Uztailak 24-25

  • Súper López. 107 min. Gaztelaniaz. Denentzat.

Bestalde, uztailaren 15ean (eguaztena), eta Leioa Auzoak programaren barruan, kultur emanaldi bana egingo dute Barandiaran Behekoa institutuko jolastokian, San Bartolome ikastetxean eta Lamiakoko eskolako patioan, denak ere 18:00etan hasita.

Barandiaran Behekoan, Trakamatraka taldeak musika-emanaldia eskainiko  du, eta"modu atseginean" birziklatzea mundu hobe baterako bidea dela erakusten saiatuko da. San Bartolomen Funes Troup konpainiak jardungo du, manipulazioan, teknika akrobatikoan eta irudian oinarritutako ikuskizuna emanez. Azkenik, Lamiakon, Tor Magoaren espektakulua izango da. Hiru ekitaldien edukiera mugatua izango da, eta maskara erabili beharko da.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun