Leioako Udalak gurera etorri berri diren pertsonek dituzten zerbitzu eta baliabide publiko guztiak biltzen dituen gida argitaratu du. Informazio hori publiko zabalago bati emateko, gida zazpi hizkuntzatan argitaratu da, "udalerrian bizi diren pertsonen hizkuntza-aniztasunari erreparatuta": euskara, gaztelania, ingelesa, frantsesa, errumaniera, arabiera eta txinera.
Udalak orain dela urtebete onartu zuen Immigrazio eta Bizikidetzarako II. Planean ezarritako helburuetako bati erantzuten dio gida honek. "Dokumentu honen bidez, Leioak ekintza-ildoak ezarri eta Toki Administrazioaren jarduna hobetu nahi du gure gizarteko kultura-aniztasunean gizarte-kohesioa eta kudeaketa handiagoa lortzeko", azaldu dute.
Zehazki, zazpi gairen gaineko informazioa biltzen da gidan: erroldatzea, osasun-laguntza, gizarte-baliabideak, hizkuntzen hezkuntza eta ikaskuntza, kultura, aisia eta kirola, udal-izapideak eta telefono-direktorioak, besteak beste.
Dokumentua hemen kontsulta daiteke, eta inprimatutako formatuan ere aurki daiteke, Udaleko eta Gaztelubideko Herritarren Arretarako bulegoetan eta Oinarrizko Gizarte Zerbitzuetan.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
