Astebetez atzeratu du Leioa Waterpolok liga gorenean aritzeko debuta

Leioa Waterpolo taldeko emakumeak, artxiboko irudian. © LEIOA WATERPOLO

Leioa Waterpolo taldeak itxaron beharko du PREMAAT Ligan debutatu ahal izateko. Izan ere, CN Sabadell taldearen kontra jokatzekoa zen jardunaldia astebetez atzeratu dute, urriaren 25era, hain zuzen ere. Aurreko egunean, hilaren 24an, leioaztarrek debuta egingo dute Estatu mailako waterpoloko maila gorenean CE Mediterrani taldearen kontrako partidan.

Lehenengo jardunaldirako igerilekua prest izango zuten edo ez zalantza zela eta, lehenengo jardunaldia astebetez atzeratzeko eskatu zuen Leioa Waterpolo klubak. Eskaera ontzat eman du RFEN-k; hala, lehenengo partida biak aste-akabu berean jokatuko dituzte emakumeek, pandemiaren testuinguruan joan-etorriak errazte aldera. Kontuak horrela, Leioa Waterpolok urriaren 24an eta 25ean debutatuko du Mediterrani eta Sabadell taldeen kontra, hurrenez hurren. Ligako bi faboritoak dira horiek; nazioarteko kirolariez jositako taldeak dira eta Europako lehiaketan parte hartuko dute.
 

Euskal Herriko Superkopa, zapatuan

Hasierako partida horien atzeratzeari esker, Euskadiko eta Nafarroako Federazioek ahalbidetu Euskal Herriko Superkoparen finala aste-akabu honetan jokatzea. Hala, leioaztarrak Waterpolo 98'02 taldearen kontra arituko dira zapatuan Iruñeako Amaya igerilekuan. Joan den martxoaren 7tik jokatuko duten lehenengo partidu ofiziala izango da.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun