Antzerkia izango da Kultur Leioaren denboraldi berriaren protagonista

Gatibu taldearen kontzertuak zabalduko du hurrengo seihilabeteko programazioa. © KULTURKLIK

Urtarriletik ekainera arteko kultur programazioa aurkeztu du Leioako Udalak, publiko guztientzako proposamen eszeniko, kontzertu eta dantzagaz. Halaber, programaren aurkezpenean kultur gune segurua dela aldarrikatu gura izan dute arduradunek, eta hurrengo seihilabete honetarako euskal ekoizpenaren aldeko apustuari eutsiko diotela nabarmendu dute.

Programazio berriaren lehenengo kontzertua urtarrilaren 15ean, barikuan, egingo dute, Gatibu talde gernikarraren kontzertu akustikoagaz. Hala ere, ekainera arteko programa horretan, antzerkia izango da protagonista nagusia, helduentzako zein familia osoarentzako emanaldiakaz.

Bestalde, Kultur Leioatik igaroko dira Travellin´ Brothers leioztarrak eta Willis Drummond musika taldeak, besteak beste. Era beran, erakusketentzako tartea ere egongo da programazio horretan; Angel Garridoren eta Carmen Palomeroren artelanak egongo dira ikusgai, besteak beste.

Emanaldi horietarako sarrerak Kultur Leioako leihatilan erosi ahal izango dira gaurtik, hilaren 11tik, aurrera; programazioa eta informazio guztia Kultur Leioako webgunean dago eskuragarri.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun